منتديات نادي الناصر الشامل
مرحباً بك في منتديات نادي الناصر

منتديات نادي الناصر الشامل

منتدي نادي الناصر الشامل غير مسؤول عن اي موضوع يطرح باقسامها وان المسؤول الوحيد هنا هو صاحب المقال (الموضوع)
 
الرئيسيةالرئيسية  صفحة البدايةصفحة البداية  اليوميةاليومية  مكتبة الصورمكتبة الصور  س .و .جس .و .ج  بحـثبحـث  التسجيلالتسجيل  دخول  

شاطر | 
 

 خاص لعقد الجلاد

اذهب الى الأسفل 
كاتب الموضوعرسالة
محمد حسن عبد الله
عضو متميز
عضو متميز
avatar

سيد الاستغفار : اللهم أنت ربي لا إله إلا أنت ، خلقتني وأنا عبدك وأنا على عهدك ووعدك ما استطعت أعوذ بك من شر ما صنعت، أبوئ لك بنعمتك على وأبوئ بذنبي ، فاغفر لي فانه لا يغفر الذنوب إلا أنت
عدد الرسائل : 587
العمر : 38
ناصرابي : نصرابي موت
تاريخ التسجيل : 30/06/2007

مُساهمةموضوع: خاص لعقد الجلاد   الأربعاء يونيو 04, 2008 12:53 am




اتمني ان تنال الرقبول


عقد الجلاد
تبتبا ..


تبتبا تبتبا تبتبا تبتب

باكر تعرف تقرا وتكتب

وياما ترتب

نحنا بنحلم وكم نتمنى

هي تحقق كل ما تحب

تبني حياتا الند بالند

اي مكانة وخانة تسد

هدهدا هدهد كل الورد ينوم ويفرهد

زي عصفورة تطير وترك

تحبا وتمسك وتاني تفك

سيبا تفكفك سيبا تلكلك عايزة تنطط

بكرة حترسم وياما تخطط

بكرة حا يبنوا مدائن ضو

ما بيعكر صفو الجو صفارة حرب

تشطب من قاموس الدنيا

الضرب الشك الخوف

ينعموا كم بالشم والشوف واغاني الحب

افتح بابك آمن تب

زي ما النهر بيلقى مصب

اي حمامة بتلقى الحب

تلقى الورده الندى في الكم

تلقى حداها جناها الام

يرضع صافي حليب الحب

نقدل نحنا الجد والعم

تملا عيونا كهارب سد

باباً جاب الهم والزم والصد ينسد

نفرح لما ندمع جد

مد البصر الامل يمتد

العمل يشتد البنا ينتم الغنا يمتد

هدهدا هدهد

اكتبي اكتبي الف المد

حمام وسلام وسعادة بجد

اكتبي اكتبي ياء المد

سرير وعصير وعبير ينشم

اكتبي اكتبي واو المد

حقول وعقول تقرا المجهول كتاب الغد

اكتبي علم وسلم

لا حد يئن لاتسمع بم

لا ينزف دم

لا يعجز رد

لا يعجز طب

لا دمعه في خد

تبتبا تبتبا تبتبا تبتب





عقد الجلاد
لانك عندي كل الخير ..


[align=center]لانك عندى كل الخير

وجيهك فرحة الدنيا

ودواخلك زى شعاع النور

عرفتك وكنت زى شفتك

قبل القاك

وزى انك بتنبعي من فرح جواى

تمسحي عن رؤاى الضيم

وتضحكي للزمان الجاى

وتتفجر مسامك ضي

مع الصبح الغشانا شوى

كأني معاك كائن حي

كأنو صفاك كأنو الحل

افارقك والعمر عندك

زهيراتاً غشاها الطل

واحاسيسك بتتكمل

غنيواتك بتتبارك مع

الايام وتتجمل

افارقك والزمان اجمل عشان

تشعل ملامحي ضياك كل مانجيمه

تتحول

وشان تفضل ملامحك فيّ زى ماكنتي في الاول




[/align]

الاهلية

عقد الجلاد



بسم الله ابتديت متل البرق لاحت

فى الشين والفسل بقينا نتباحت

طال الكان قصير والعالى اتاحت

والصولات حليلن ملكتن راحت



مالك يا زمان شبعتنا هولا

لبست الناس تيابا حاشا مى هولا

يات من كان يجي دماعو مبهوله

ولله راحت بقت البواجهولا



مالك يا زمان شبعتنا وح ووحيح

صح الدون كضب

كضب العوالى صحيح

يات من كان انا جعلتو لى صليح

عقرب حزّه لى ويا نفسي زين ومليح



فى احوال الزمن صار الفكر حاير

والياباك خلو عندو شن داير

فوق اهل الفكر كاس الوحيح داير

نفد سوق النفاق سوق السمح باير



تب الشباب ان بقا كواس

تب الصبى ان قطع المروة خلاص

تب الشايب ان بقى وسواس

تب الاقربين الاتفاتتو الامغاص


عقد الجلاد

عطبرة



من قمت من بيتنا ومشيت

بطاقتي صورة مصغرة

شايل معاي شنطة صفيح

حزمة هموم

ولدا متين بقي للسفر والاغتراب والدردرة

كان الزمان لسة رضى

والناس ظروفها مقدرة

وانا في القطار اصغر صبي

امال تفيض متفجرة

لما القطار صفر وقف

بهرتني صورة عطبرة

دي محطة الوطن الكبير كانت تضج متحضرة

ونزلت ماشي على الرصيف

اغبش هدومي مغبرة

الهجرة من زمناً قديم زي ساقية فينا مدورة..

عائلة ابوي عبد الرحيم من حلفا جات متهجرة

اديلة او والله رن فجلي

بلد نفاي اموقا كجلي نورين موقو

كن جواب كفاي

دقيتني نفص كورين لوجي

نفس القطارات والسكك

يوم مقبلة ويوم مدبرة

كان عمري 12 سنة

شايل التقيلة مبكرة

رحال بدون زاد لا متاع

كان لي كتاب ومفكرة

لميت شتات بعض الحروف

وقرايتي تبدو مكسرة

من قمت من بيتنا ومشيت

بطاقتي صورة مصغرة

شايل معاي شنطة صفيح حزمة هموم

ولدا متين بقي للسفر والاغتراب والدردرة



عقد الجلاد


الطمباره والغناى

محمد القدال

نحن اهل الفرحه جينا

لاالمدامع وقفتنا ولاالحكايات الحزينه

لما درب الرايحه جابنا جابنا في هادى المدينه

ياولدى الدروب شقاقا بحر التيه

ليك درب ولا دربين مساك الدروب ضهاب

ليك قلب ولا بالين وسواى القلوب كضاب

ليك ضهر ولاسرجين ركاب السروج وقاع

شق ياولدى بحر التيه بتتدردر وتتودر

ولامن يوم علي تايتنا ديك ترسي

نعزك بالقبيل داخرنو ليك

الشوق بحر ياولدى بحراً تيه

قت ليك العليك ادرابو لا تنغش ولا ترضابو لاتنغش

في الزمن الزمين والكي يسوهو خلاف عشان الني

عليك الدور وتصريف الليالي بدور تشيل ما شلنا من الهم

ولا من دمعه ترمي الدمعه فوق دربك

روح يابا .. وابق قفاك لاتعاين ولاتعاين علي موطاك

ولا تندم علي خطوا تملي مشيتو لى قدام

وابقي العاتي زى سنطتنا زى صبرا نلوك فوق مرو زى الزاد

لاشيتاً نزل في الجوف ولابرجع ولا بنزاد

واركز للبجيبها الريح تقيف انت ويشيلها الريح

وابقي العاتي والدرب الوراك مسدود و شيل شيلتك

بقيت للنص لاحلما بجيب البر ولا حدود

وانبليتا اختا الرمله ما تقع البكان الهش

هي الممطوره مابتبالي من الرش

النعمه بتعرف عاطيها والجمره بتحرق واطيها

بالكيله عطانا و ما لقينا فوق جمر خطانا وما لقينا

يوم الوعد ياحليوه فيك الدنيا ما كانت شروق

الا الارض متكشفه متبلمه نعمنو من خير الخريف

لافحالها شال منطرحه خضرا وفرحه دوب تتشابي لي عين الشمس

من بت حليوه النفس بيضا كذا الحليب

والروح مشحتفه في البلود الفيها ريحتك

للبعود من فزعة الغربة البساسق فوكا

مو راجع ولا بالحيل قريب

الروح مشحتفه في الحبيب القلب بكر الدنيا ما شافت جديدو

ولا الحزن دقالو باب

وشفتي كيف يوم الوعد كيفنو مترامي الغمام

والقمري زغرد للبلوم النسمه هبت مرتين

يا حليوه يوم دقيت بارضك فاس خصيب والتانيه في

يوم الوعد والايد تسالم في الايدين

والام تقالد فوق جناها تشمو زين

وحليوه صاحيه حليوة ضاحيه كذا النسيم

والدنيا غيم وحليوة جد جد ياولد قول للبلد

قايل غناوي الحزن ليش شايل مساديرك مجامر دمع ليش

ليش يا بلد والناس تريد والدنيا كل ما نريد تزيد

تملا الايدين تفرح تهش

لو صحيح غنينا بالدمعه الحميمه ولو دموع الفرحه ما لاقت غنانا

بكره نرجع تاني للكلمه الرحيمه شان هنانا شان منانا

شان عيون اطفالنا ما تضوق الهزيمه





حاجه آمنه
عقد الجلاد

حاجة آمنة أصبرى

عارف الوجع فى الجوف شديد

عارفك كمان ما بتقدرى

اصبرى .. اصبرى

جاهلك شكى وجاهلك بكى

وفى بيتك المرق اتكى

والشيء البحير ومابحير

مابيه يا حاجة الزكاة ...

طلع الصباح لو ليك مراد

يا حاجة ما تطلع شمس

والليلة عندك زى أمس

لسه الرويدى مع الصباح

من مدة ماجاب ليك خبر

كان جوفو زى جوف العيال

من مدة داير ليه حجر

والله على الزمن الحجر

المابى بالصبر اتكرى


سرحتى فى هموم العيال

كيفن يعملوا مع الدروس

وسرحتى فى حق الفطور

باقى الامور البى القروش

واحد زمن داير ردا

واحد خلاص قلموا اتكسر

زى التقول أكلوا الصبر

يا حاجة آمنة اصبرى


مشيتى لى برج الحمام

برجك صفحتين ما بزيد

ومشيتى لى برج الحمام

كان تلقى ليك جوزاً جديد

يمكن بعد طلع الصباح

يغشاكى زولاً يشترى

هبشتى جاى فتشتى جاى

كان تلقى سكر بس محال

باقى الرطيل الفى الكرت

يا حاجة سفوهوا العيال

يا حليل زمان وسنين زمان

يا حاجة لو تذكرى ... يمه


وسمعتى صوت جاك من بعيد

وبعد قليل بابك ضرب

وسمعتى صوت جاك من بعيد

شالك تعب ... ختاك تعب

يا حاجة ناس المويه جوك

أصلو الشهر روح جرى

يا حاجة آمنة اصبرى


بعد صراع وصراع طويل

يا حاجة بينك والمحال

ما لقيتى فى داك النهار

شيتاً ويجو ياكلوا العيال

حبة عدس ما بسوى شيئ

وينو البصل وينو اللحم

حبة عجين ما بسوى شيئ

وينو الدقيق وينو الفحم

من جاى لجاى

هبشتى جاى فتشتى جاى

كان تلقى شيئ

لازمك كتير شان تقدرى

لازمك كتير اتقدرى



الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alnassirkassala.forumotion.com
 
خاص لعقد الجلاد
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات نادي الناصر الشامل :: الناصر الثقافى :: الموسيقى والفن-
انتقل الى: